Sjávarútvegsráðherra (Árni M. Mathiesen):
Herra forseti. Innan ráðuneytisins og á vegum stofnana ráðuneytisins hafa verið gerðar kostnaðaráætlanir á því hve mikið það mundi kosta að gera rannsóknir í þá veru sem hv. fyrirspyrjandi er að leita svara eftir. Hins vegar hefur ekki farið fram nein rannsókn á þessu efni enn þá en ég hef lagt á það áherslu við forstöðumenn stofnananna að á næsta ári fari fram forathugun á því hvort um sé að ræða hagkvæma kosti nýtingar fyrir okkur og að þær athuganir verði gerðar innan þeirra fjárhagslegu ramma sem stofnanirnar munu væntanlega búa við á næsta ári.