Fyrirspyrjandi (Þuríður Backman):
Hæstv. forseti. Ég þakka hæstv. ráðherra fyrir svörin en ég vona að skýrsla Háskóla Íslands sem nú liggur fyrir sé á þann veg að hægt verði að fara í úrbætur þegar í stað. Ég get ekki svarað fyrir hvern og einn en ég veit alla vega að staða rekstraraðila á Austurlandi, þeirra sem núna eru í rekstri, er mjög alvarleg og þeir hafa sagt að þeir muni hætta ef ekkert kemur inn í reksturinn til lengri tíma sem þeir geta treyst á að muni standa. Það er ekki hægt að reka fyrirtæki á lánum. Þeir hafa gert það í þeirri von að einhverjar úrbætur verði, því það er hreint og beint krafa okkar sem búum úti á landi að hafa slíka þjónustu. Það er ekki bara þjónusta við áætlunarflugið, að komast á leiðarenda heldur varðar þjónustan ekki síður börn sem eru í skóla, að þau komist heim um helgar, og að tryggt verði að fólk komist á milli staða án þess að verða að treysta á einkabíla.
Ég heiti á hæstv. samgrh. að taka skýrslu Háskóla Íslands til afgreiðslu og viðunandi lausn finnist til framtíðar þannig að þessir rekstraraðilar geti greitt upp skuldir sínar og rekið fyrirtæki sín áfram.