[prenta uppsett í dálka] 41. fundur, 125. lþ.
Viðskiptaráðherra (Finnur Ingólfsson) (andsvar):
Herra forseti. Ég held að þetta sé hárrétt mat og tek nákvæmlega undir það. Í vaxandi mæli mun það verða svo að íslensk fyrirtæki munu leita eftir bankaþjónustu erlendis ef hún býðst á sambærilegum eða betri kjörum en íslenskir bankar geta veitt. En við þurfum að hafa það markmið og kappkosta að geta boðið og verið samkeppnisfær á þessu sviði.
Einstaklingarnir munu hins vegar ekki í jafnríkum mæli og fyrirtæki leita eftir þessari þjónustu erlendis í framtíðinni. En til þess að þeir geti fengið fjármálaþjónustu á svipuðum kjörum og fólkið í löndunum í kringum okkur fær þá þurfum við að vera með öflugar einingar. En ég tek undir það að svo stór banki sem þarna er lýst --- hvaða samsetning banka það væri, hvort það væru Landsbanki og Búnaðarbanki saman eða Íslandsbanki og Landsbanki, sem eru stærstu samrunaeiningarnar í þessu --- væri fyrirtæki með mjög mikla markaðshlutdeild. Og þá er það auðvitað spurning hvort ekki komi til kasta samkeppnislaganna að skoða þá hluti.
