Jóhann Ársælsson:
Hæstv. forseti. Þetta þingmál snýst í einfaldleika sínum um það að breyta heimild til hlutafjáraukningar í heimild til sölu hlutafjár sem er skynsamleg ráðstöfun og ég styð hana. Ýmsar vísbendingar eru um að stjórnvöld hafi á prjónunum einhvers konar endurskipulagningu á fjármálamarkaðnum en umræður á hv. Alþingi hafa ekki leitt í ljós hvaða stefnu þau hyggjast taka í því efni. Í stuðningi mínum við þingmálið, sem er til ákvörðunar Alþingis, er ekki fólginn stuðningur við samruna stærstu fjármálastofnana á markaðnum hér, þ.e. Landsbanka og Íslandsbanka. Slík ákvörðun mundi setja íslenskan fjármálamarkað úr skorðum, skapa ójafnvægi og erfiða samkeppnisaðstöðu annarra fjármálastofnana á markaðnum þannig að óviðunandi væri.
Ég tel einnig að á meðan ríkið er þátttakandi í fjármálamarkaði eigi það að eiga ráðandi hlut í öflugustu fjármálastofnuninni, þeirri stofnun sem við getum kallað þjóðbanka. Ég segi já.