[prenta uppsett í dálka] 46. fundur, 125. lþ.
Margrét Frímannsdóttir:
Virðulegi forseti. Verðbólgan mælist nú 5,6% miðað við síðustu tólf mánuði. Viðskiptahallinn á árinu er miklum mun meiri en gert var ráð fyrir í byrjun október. Spáð var að hann yrði 29 milljarðar. Nú tveimur mánuðum síðar stefnir í að hann verði 38 milljarðar. Hreinar erlendar skuldir fara vaxandi og stefna í að fara vel yfir 50% af vergri landsframleiðslu á næsta ári. Þjóðhagslegur sparnaður hefur ekki verið minni um langan tíma.
Ekki er tekið á neinum þessara þátta í frv. til fjáraukalaga sem hér er verið að afgreiða, ekki heldur í þeim tillögum sem hæstv. ríkisstjórn hefur lagt fram varðandi fjárlög næsta árs. Samfylkingin getur ekki undir neinum kringumstæðum tekið þátt í þeim vinnubrögðum eða þeirri afgreiðslu sem hér fer fram.
