Þuríður Backman:
Herra forseti. Það er langt síðan hæstv. ráðherra talaði fyrir þessu frv. En hér er enn og aftur komið frv. um breytingu á lögum um brunavarnir og brunamál þar sem skerða á tekjustofn sem renna á til Brunamálastofnunar ríkisins. Hér er um að ræða brunavarnagjald sem má nema allt að 0,045 prómillum af vátryggingarfjárhæð brunatrygginga fasteigna og lausafjár.
Hér er enn ein stofnunin í fjárþörf. Eftir því sem mér reiknast til er þetta ekki mjög há upphæð. Það fer kannski eftir því hver segir frá en 13 millj. á fjárlögum eru ekki há upphæð. Brunamálastofnun er með margvíslega starfsemi. Hún rekur úttektarstofu og nýlega hefur komið fram í fréttum að úttekt var gerð á grunnskólum á vissum svæðum landsins. Þar var mörgu ábótavant varðandi brunavarnir. Það þarf að gera samsvarandi úttekt á fleiri stofnunum, t.d. sjúkrastofnunum. Það þarf að gera sérstaka úttekt á atvinnuhúsnæði og ekki síst á bændabýlum og útihúsum.
Ástæðan fyrir þessu er ekki aðeins að menn hafi ekki fylgt eftir ákvæðum í byggingarreglugerð um að gæta þess að útgönguleiðir og allar brunavarnir séu í lagi heldur hefur rafmagnseftirlit verið fellt undir Löggildingarstofu og hluti af þeirri breytingu er breytt eftirlit á rafmagnsúttekt á öllum nýlögnum. Þetta er að margra mati mjög varhugavert, sérstaklega til sveita þar sem jafnvel hefur verið erfitt að fá rafvirkja í vinnu. Úttektir Löggildingarstofunnar eru stikkprufur þannig að annars þurfa menn að bjarga sér sjálfir. Raflagnir eru í raun og veru brunagildra á mörgum stöðum. Þetta vita þeir sem fylgjast með. Bara varðandi þetta hlutverk Brunamálastofnunar með úttekt og eftirlit brunavarna þyrfti að vera miklu meiri vinna í gangi til þess að forðast stórslys.
Brunamálatofnunin rekur farskóla. Þar er þjálfun slökkviliðsmanna og mjög mikilvæg starfsemi fyrir landsbyggðina alla. Þeir fá það hlutverk að vera á vakt vegna mengunarslysa, að vera í mengunarvörnum. Þeir eiga að farga eiturefnum og fara með þau efni. Verkefnin eru næg í dag og eiga eftir að verða fleiri í náinni framtíð. Ég mótmæli því þessari skerðingu þar sem Brunamálastofnun þarf á þessu fé að halda og ekki síður vegna þess að mér finnst að svo lengi sem við höfum sérmerkta sjóði til ákveðinna verkefna þá beri okkur að nota það fé til verkefnanna.
Ef framlögin í sjóðina eða tekjustofnarnir eru of háir og menn telja að verkefni stofnunarinnar þurfi ekki á þessu fé að halda þá væri þá nær að lækka tekjustofnana og láta tekjustofnana fara í þessi ákveðnu verkefni eða þá að hætta við þessa séreyrnamerktu tekjustofna.