Steingrímur J. Sigfússon:
Herra forseti. Í þessari brtt. leggjum við þingmenn Vinstri hreyfingarinnar -- græns framboðs til að við liðinn Greiðslur vegna sauðfjárframleiðslu bætist 250 millj. kr. og það verði merkt stuðningi við sauðfjárbændur. Það er enginn vafi á því að fáar ef nokkrar stéttir hafa á seinni árum mátt þola annað eins tekjufall og aðrar eins þrengingar og einmitt þessi stétt manna nú á milli ára en algengt er að bændur meti tekjufall sitt á stærðargráðunni 30--40%. Hvað sem líður væntanlegum búvörusamningi sem vonandi verður gerður fljótlega þá er ljóst að það eru allar aðstæður til þess og brýn þörf á að grípa til bráðaaðgerða vegna þessa vanda. Það eru mikil vonbrigði, herra forseti, að hæstv. ríkisstjórn skuli ætla að loka fjárlagafrv. næsta árs án þess að sýna nokkurn lit í þessum efnum. Við leggjum því til, þó í litlu sé, að þarna verði aukið við 250 millj. til að koma eitthvað til móts við sárasta vandann í þessum efnum.