Einar Már Sigurðarson:
Herra forseti. Nú er komið að lokaafgreiðslu fjárlaga fyrir árið 2000. Því miður tekur frv. ekki á þeim meginvandamálum sem til staðar eru í efnahagskerfi þjóðarinnar. Það er ekki tekið nægilega mikið mark á þeim viðvörunum sem fram hafa komið í umræðu um fjárlög og frá ýmsum efnahagsstofnunum. Viðskiptahallinn er vaxandi. Verðbólgan er komin í gang á ný og þenslueinkenni eru mikil. Þá er ekki bættur hagur þeirra sem minnst hafa fengið út úr góðærinu.
Herra forseti. Fjárlögin eru á ábyrgð stjórnarmeirihlutans. Þingmenn Samfylkingarinnar munu sitja hjá.