Ólafur Örn Haraldsson (andsvar):
Virðulegi forseti. Hv. þm. sagði að nú væru gefnar kærkomnar jólagjafir. Ég vil spyrja hv. þm.: Er það siður á góðum heimilum að gefa sumum jólagjafir og láta önnur börn eiga jól án jólagjafa? Og ég vil líka spyrja: Heldur hv. þm. að þeim sem fengu jólagjafirnar eða eru að fá jólagjafirnar frá okkur, sé ekki nokkur hryggð í brjósti að vita að um leið og þetta fólk er að fá sín réttindi eru aðrir skildir eftir utan garðs?