[prenta uppsett í dálka] 47. fundur, 125. lþ.
Ásta Möller (andsvar):
Virðulegi forseti. Ég tel enga ástæðu til þeirra geðshræringa sem komu fram í máli hv. þm. Ólafs Arnar Haraldssonar. Það varð niðurstaða nefndarinnar eftir ítarlega umræðu að þetta mál yrði tekið til skoðunar á vorþingi í tengslum við frv. um breytingu á lögum um staðfesta samvist.
Það var niðurstaða mín þegar ég tók ákvörðun í því máli að þetta frv. til ættleiðingarlaga væri það mikilvægt að það væri á engan máta nokkrum manni greiði gerður að fresta því á meðan unnið væri að breytingum varðandi ættleiðingar samkynhneigðra og ég stend við það.
Hins vegar kom það líka fram í máli mínu í nefndinni að þegar það frv. kemur til umfjöllunar á vorþingi yrði ég tilbúin til þess að veita því brautargengi. Ég tel hins vegar að ítarleg umræða þurfi að fara fram í þinginu og jafnframt þurfi umræða að fara fram í þjóðfélaginu varðandi stjúpættleiðingar og frumættleiðingar því að skiptar skoðanir virðast vera um það mál. En ég ítreka að ég er tilbúin að taka þátt í þeirri umræðu á vorþingi og veita því brautargengi, sérstaklega varðandi stjúpættleiðingu.
