[prenta uppsett í dálka] 49. fundur, 125. lþ.
Þuríður Backman (andsvar):
Herra forseti. Hv. þm. Hjálmar Árnason sagði í ræðu sinni áðan að hann teldi að þetta yrði hugsanlega síðasta deilumál varðandi virkjanir. Ég óttast að svo verði ekki, heldur sé þetta í raun upphafið að mjög heitum deilumálum framtíðarinnar. Hann vitnaði til framkvæmdaáætlunar ríkisstjórnarinnar, maður, nýting, náttúra, sem er mjög góð og við hefðum átt að vera farin í fyrir löngu. En úr því að farið er að vinna þetta þá er algert skilyrði að allar jökulárnar, þ.e. Jökulsá í Fljótsdal, Jökulsá á Brú og Jökulsá á Fjöllum séu inni í þessari áætlun. Ef það á að undanskilja þessi stórfljót í þessari áætlun þá er hún markleysa.
