Kristinn H. Gunnarsson:
Herra forseti. Ég vil lýsa undrun minni yfir framgöngu hv. stjórnarandstæðinga í þessum umræðum í upphafi fundar. Það mál er til umræðu sem þau gera að umfjöllunarefni undir liðnum um fundarstjórn forseta. Þeim er ekkert að vanbúnaði að koma sjónarmiðum sínum að um þetta mál í ræðum sínum undir dagskrármálinu. Ég tel að um sé að ræða misnotkun á þingsköpum að fara upp til að ræða efnislega um þetta mál, fullkomlega fráleit framkoma fyrir utan það að ekki eru bornar brigður á að það sé rétt sem haldið var fram að mikilvægar upplýsingar komu ekki fram í iðnn. Það er kjarni málsins.