Iðnaðarráðherra (Finnur Ingólfsson) (andsvar):
Herra forseti. Ég tek alveg undir það með hv. þm. að það er mjög mikilvægt þegar menn standa í alþjóðasamningum eins og þessum að menn gæti vel að í öllum efnum og það hefur verið gert. Ég fór yfir það áðan í ræðu minni að þeir samningar sem við höfum verið að gera á undanförnum árum hafi skilað íslensku þjóðarbúi ótrúlegum ávinningi, ekki bara beint inn í þjóðarbúið heldur líka inn í orkufyrirtæki eins og Landsvirkjun sem skapar þau tækifæri sem ég lýsti áðan um lækkun raforkuverðs til almennings í upphafi nýrrar aldar.
Mér fannst hv. þm., og ég bið hann afsökunar á því ef það hefur ekki verið meiningin, vera hálfgert að setja sig á háan hest í fyrri ræðu sinni og vanda um fyrir mönnum hvernig staðið væri að. Þá kom upp í huga minn hvort það gæti verið að hv. þm. hefði það mikla reynslu af samningum eins og þessum að fullt mark væri takandi á honum. Ég tek hins vegar fullt mark á öllum viðvörunarorðum í þessum efnum. En reynsla hv. þm. er ekki mikil og það var í hana sem ég vitnaði.