Frsm. 1. minni hluta samgn. (Jón Bjarnason):
Herra forseti. Megintilgangur þessa frv. er að leggja gjald á smábátaeigendur. Það á að leggja gjald á smábátaeigendur til þess að greiða í rekstur á vita- og siglingabúnaði meðfram ströndum landsins. Þetta er grunnöryggisbúnaður sem íslenska ríkið á að vera stolt af að geta staðið undir og rekið sem grunn að öryggisþjónustu sinni. Það er algerlega gegn þeim hugmyndum og þeim hugsjónum sem við í Vinstri hreyfingunni -- grænu framboði höfum að skattleggja með þessum hætti sjófarendur á litlum bátum meðfram ströndunum.
Herra forseti. Þingmenn Vinstri hreyfingarinnar -- græns framboðs greiða því atkvæði gegn þessu frv. þó að aðrar greinar þess feli í sér margt gott sem vert væri að styðja en megintilgangur þessa frv. er aukin skattheimta á smábátaeigendur og því höfnum við.