Ólafur Örn Haraldsson:
Hæstv. forseti. Með frv. þessu er veiðikortagjald hækkað vegna rjúpnarannsókna. Það er m.a. gert í framhaldi af þáltill. þess þingmanns sem hér stendur. Að mínu mati á ríkisvaldið að standa undir þessum náttúrufarsrannsóknum. Veiðikortagjaldið og veiðikortakerfið er vöktunarkerfi sem á sér skamma reynslu að baki og byggir á samkomulagi og trausti milli veiðimanna annars vegar og veiðistjóra og umhvrn. hins vegar. Nokkrir hnökrar voru í þessu samstarfi en þeir höfðu verið leystir og horfðu menn fram á betri tíð. Með frv. þessu án samráðs við skotveiðimenn gæti það samstarf raskast.
Ég tel jafnframt að finna hefði mátt aðrar leiðir til þess að afla fjár í sátt við skotveiðimenn og enn fremur hefði þurft að ná samkomulagi um reglur um úthlutun úr veiðikortasjóði. Því greiði ég ekki atkvæði.