Guðjón A. Kristjánsson (andsvar):
Herra forseti. Það er sennilega rétt að misskilningur sé algengasti skilningurinn sem notaður er og ég hygg að þannig sé stjórnarliðum farið í þessu máli að þeir byggi skoðun sína á þessum algenga misskilningi sem svo margir eru haldnir. Það er sennilega algengasti skilningurinn í landinu að styðjast við og nota misskilning.
Mér finnst að menn eigi að fara að hæstaréttardómi þegar hann er byggður á tivitnun í stjórnarskrá, sama hvort mér líki þeir dómar vel eða illa. Þannig lít ég á þetta mál. Og ef það er misskilningur hjá mér að áliti hæstv. utanrrh. þá verður svo að vera. En ég ætla að leyfa mér að hafa þann skilning (Gripið fram í: Misskilning?) líka þó hann sé skilinn sem misskilningur. Ef skilningur minn er túlkaður sem misskilningur af hæstv. utanrrh. þá verður bara við svo að búa.