[prenta uppsett í dálka] 61. fundur, 126. lþ.
Ögmundur Jónasson:
Herra forseti. Hér er lagt til að vísa til nefndar frv. sem stríðir gegn stjórnarskrá Íslands og gengur á svig við skýra niðurstöðu hæstaréttar landsins sem fékk það verkefni að skera úr um það hvort heimilt væri, með tilvísun til tiltekinna ákvæða í almannatryggingalögum, að skerða tekjutryggingu öryrkja vegna tekna maka hans eða hennar. Þessi tekjutrygging er samkvæmt gildandi lögum 32.566 kr. Samkvæmt þessu frv. er hún færð niður í 25 þús. kr. Niðurstaða Hæstaréttar Íslands er afdráttarlaus. Þessi skerðing er óheimil, enda ber að líta á þessa tekjutryggðu fjárupphæð sem einstaklingsbundinn stjórnarskrárvarinn rétt.
Hér er fjallað um mannréttindi. Við munum ekki veita brautargengi frv. sem brýtur í bága við úrskurð Hæstaréttar Íslands og hefur að engu stjórnarskrárvarin mannréttindi.
