Jóhanna Sigurðardóttir (andsvar):
Herra forseti. Það er ótrúleg bíræfni og óskammfeilni af hv. þm. að halda fram þessu bulli sínu um kjör öryrkja á sl. fimm árum þegar allir nema hann og þeir sem eru með honum í stjórnarliði vita að samfelld árás á kjör öryrkja hefur verið af hálfu þessarar ríkisstjórnar á síðustu fimm árum. Þeir byrjuðu á því eftir að mannréttindaákvæði stjórnarskrárinnar var samþykkt að skera á tengsl launa og lífeyris með þeim afleiðingum að grunnlífeyririnn hækkaði um 25% á sama tíma og launavísitalan hækkaði um 41,5%. Á árunum 1998--2000 hækkuðu lífeyrisgreiðslur um 11% en launavísitalan um 17% þrátt fyrir það ákvæði sem þingmaðurinn nefndi þar sem vitnað var í orð forsrh. um að miða ætti við launavísitölu og allir trúðu því, líka stjórnarandstaðan. En það hefur verið miðað við neysluvísitölu en ekki launavísitölu á þessum tíma og þar með svikið það sem stóð í lögum. Það er því hrein óskammfeilni af hv. þm. að haga orðum sínum eins og hann gerði hér áðan.