Þuríður Backman (andsvar):
Herra forseti. Ég ætla ekki að fara í þessar söguskýringar. Ég hreinlega treysti mér ekki til þess. Aftur á móti vil ég ítreka að það sem er fylgiskjal með nál. minni hlutans er birt úr opinberum gögnum og er staðreynd, sama hvernig við förum í þessar sögulegu skýringar. Við eigum að fagna öllum þeim kjarabótum og hækkunum umfram það sem gerist á almennum launamarkaði sem fara til öryrkja og ellilífeyrisþega. Við eigum að gera það. Og við eigum að standa vörð um þau kjör. Vissulega var það viðleitni í þá átt að hafa slíka tryggingu svo bætur færu ekki alveg hreint í botninn.
Ég ætla að vona að við náum í framtíðinni samstöðu um að bæta kjör þeirra verst settu í þjóðfélaginu. Við í Vinstri hreyfingunni -- grænu framboði komum með margar tillögur um það á síðustu fjárlögum, en þær voru allar felldar.