[prenta uppsett í dálka] 70. fundur, 126. lþ.
Gísli S. Einarsson:
Herra forseti. Hér er hreyft afar brýnu máli, sérstaklega þó í seinni hluta spurningarinnar sem lögð var fram og ber að þakka það.
Ágallar kvótakerfisins eru að verða flestum ljósir og menn vita í hverju þeir felast. Kerfinu var þröngvað á í miklum flýti og asa árið 1983, svo maður líti svo langt aftur, á hinu háa Alþingi Íslendinga. Talsmenn kvótans töldu að með þessu kerfi væri búið að leysa byggðavandann á Íslandi. Og ég vísa þar með í ræður einstakra þingmanna frá þeim tíma.
Herra forseti. Kvótakerfið ætlar þvert á móti að reynast banabiti ýmissa sjávarbyggða. Þetta er dapurleg 16 ára reynsla. Ég tek undir með hv. fyrirspyrjanda: Hver eru ráð hæstv. byggðamálaráðherra gagnvart því sem við blasir varðandi framkvæmd kvótakerfisins?
Fróðlegt væri að vita það í ljósi þess að hér hafa tveir frammámenn Framsóknar vitnað um að þeir séu á móti kerfinu eins og það er framkvæmt.
