Sigríður A. Þórðardóttir:
Herra forseti. Það er augljóst af bréfi þingmanna Samfylkingarinnar að þeir virðast standa í þeirri meiningu að þingskapalög gildi ekki þegar þeir eiga í hlut. Það er alveg ljóst að það er á forræði nefndar hvort hún tekur upp mál að eigin frumkvæði. Þetta eru leikreglur sem allir þingmenn þurfa að þekkja og hlíta. Það var einfaldlega ekki meiri hluti í menntmn. til að verða við ósk þingmanna Samfylkingarinnar í þessu efni og þar með er málinu lokið og stoðar ekki að klaga í forseta.
Ég hef hins vegar bent þingmönnum Samfylkingar á að þingmál Guðmundar Árna Stefánssonar hlýtur að verða til umræðu á þinginu síðar og eftir að því er vísað til nefndar gefst auðvitað tækifæri til að fjalla um það þar. Einnig hef ég bent þingmönnum Samfylkingar á að þeir geta auðveldlega orðið sér úti um svör beint frá menntmrh. með því að leggja fyrir hann fyrirspurn á Alþingi en það er alveg ljóst að þeir virðast af einhverjum ástæðum ekki treysta sér til þess.