Halldór Blöndal (andsvar):
Herra forseti. Mér þykir vænt um að það skuli vera hægt að benda á það að Náttúrurannsóknastöðin hafi séð um það að endurbyggja gamla prestsbústaðinn á Skútustöðum. Hann var satt að segja orðinn svolítið slitinn svo ekki veitti af að gera eitthvað fyrir hann.
En gagnrýni mín vissi nú ekki að því hvort Náttúrurannsóknastöðin stæði í húsbyggingum eða ekki eða tæki slíkt að sér. Á Skútustöðum eru ágætir menn aðrir sem kunna til þeirra verka og þurftu ekki á Náttúrurannsóknastöðinni að halda. En á hinn bóginn hefur sá tónn sem hefur komið frá þeim sem ráða Náttúrurannsóknastöðinni til fólks í Mývatnssveit verið vægast sagt óviðkunnanlegur að minni hyggju.
Nú má vera að hv. þm. telji að svo sé ekki og sá tónn sé eins og svanasöngur í hans eyrum eða sálmasöngur, það veit ég ekki. En ég hef ekki kunnað við það orðbragð og þær sendingar sem þaðan hafa komið til Mývetninga.