Drífa Hjartardóttir:
Herra forseti. Mig langar að geta þess að á síðasta ári var skrifstofa jafnréttismála flutt norður á Akureyri þrátt fyrir að mjög margir væru á móti því. (Gripið fram í.) Af því hv. þm. Ásta Ragnheiður Jóhannesdóttir nefnir þetta --- það er alltaf verið að reyna að reka fleyg á milli landsbyggðarinnar og höfuðborgarinnar og ég sé ekki betur en að borgarstjórinn hafi gert það. Ég las grein í Morgunblaðinu í morgun eftir dr. Guðrúnu Pétursdóttur þar sem hún hefur eftir borgarstjóra á borgarstjórnarfundi að hagsmunir landsbyggðarinnar í málefnum Reykjavíkurflugvallar byggist á sektarkennd hins brottflutta sveitamanns. Svona málflutningur á ekki að heyrast. Við erum ein þjóð í þessu landi.