Félagsmálaráðherra (Páll Pétursson) (andsvar):
Herra forseti. Ég ætla ekki að hætta mér í að ræða sérstaklega reikningsskil Hafnarfjarðarbæjar. Ég er ekki kunnugur þeim. En túlkun þessarar greinar í sveitarstjórnarlögunum sem ég vitnaði til, 67. gr. og reyndar líka 61. gr., er falin bókhalds- og reikningsskilanefnd. Hún á að setja reglur samkvæmt 18. gr. reglugerðar nr. 922/2000. Mér er kunnugt um að hún hefur ekki gengið frá þeim reglum en mun gera það alveg á næstunni. Hafi einhver misbrestur verið á bókhaldinu hjá Hafnarfjarðarbæ þá tel ég víst að í framhaldi af því verði ráðin bót á því.