Ögmundur Jónasson (andsvar):
Herra forseti. Það er rétt að samkeppni getur veitt fyrirtækjum aðhald. Ég endurtek aftur á móti að reynslan hefur verið sú að þar sem farið er út á þessa braut þá sitja menn á endanum uppi með einokun. Í grunnþjónustu af þessu tagi, hvort sem er raforkuframleiðsla eða önnur veitustarfsemi, menn hafa haft hugmyndaflug til þess að einkavæða hana líka, t.d. hafa menn í Bretlandi og víðar í Evrópu á endanum setið uppi með einokun, lakari þjónustu og hærra verð fyrir notendur, hvort sem þeir greiða það beint eða í gegnum skatta.