Ögmundur Jónasson (andsvar):
Herra forseti. Þetta er tímanna tákn. Þjóðfélag sem byggir á almennum lögum og almennum reglum víkur fyrir þjóðfélagi eftirlitsins. Þetta frv. heitir: Um eftilit með eigendum virkra eignarhluta í fjármálafyrirtækjum. Ég hefði vænst þess að ríkisstjórnin mundi reyna með lagasetningu að tryggja dreifða eignaraðild að fjármálastofnunum, eins og þingflokkur Vinstri hreyfingarinnar -- græns framboðs hafði gert tillögu um á sínum tíma og fengið góðar undirtektir hér á þinginu. Í stað þess að taka þráðinn þar upp hefur hæstv. viðskrh. lagt þetta frv. fram, þar sem Fjármálaeftirlitinu verði falið að sinna aðhalds- og eftirlitshlutverki og eftir því sem ég fæ best séð við fyrstu sýn byggir það á óljósum og harla óhlutlægum reglum.
Ég vil spyrja hæstv. viðskrh. hvort hún sjái ekki í því ákveðnar hættur að stórir eignaraðilar, hugsanlega sömu aðilar og eru að sölsa undir sig drjúgan hluta af íslensku atvinnulífi, nái undirtökunum í þessum helstu fjármálastofnunum landsins. Og hvort hæstv. ráðherra er ekki reiðubúin að skoða aðrar og virkari leiðir til þess að tryggja með lagasetningu dreifða eignaraðild að þessum fjármálastofnunum í þeim anda sem þingflokkur Vinstri hreyfingarinnar -- græns framboðs hefur lagt til hér á þinginu.