Fyrirspyrjandi (Kristján L. Möller):
Herra forseti. Fyrirspurn mín til hæstv. iðnrh. er um byggðakvóta og hljóðar svo:
Hyggst --- eða réttara sagt hefur, það er svo langt síðan fyrirspurnin var lögð fram, eða hálfur mánuður --- ráðherra beita sér fyrir því innan ríkisstjórnar að svokallaður byggðakvóti verði aukinn úr 1.500 tonna afla í 3.000 tonna afla eins og lagt er til í tillögu stjórnar Byggðastofnunar sem send hefur verið til ráðherra byggðamála?
Herra forseti. Ástæða fyrirspurnar minnar eru orð sem komu hér fram í umræðum 15. febrúar árið 2001 þar sem formaður Byggðastofnunar, hv. þm. Kristinn H. Gunnarsson, sagði m.a.:
,,... að eitt af þeim verkum sem ný stjórn Byggðastofnunar kom að í upphafi síðasta árs var erfitt atvinnuástand í Hrísey og reyndar sáum við fram á að það yrði erfitt á nokkrum stöðum öðrum á landinu. Það varð því niðurstaða stjórnar að ég ritaði bréf til hæstv. iðnrh. fyrir hönd stjórnar og óskaði eftir því að byggðakvóti yrði aukinn úr 1.500 tonnum í 3.000 tonn.``
Þetta eru ástæður þess, herra forseti, að ég legg fram þessa fyrirspurn. Mig langar að heyra það frá hæstv. byggðamálaráðherra hvort ráðherrann hafi lagt það til í ríkisstjórn að þetta yrði gert og hver niðurstaðan af því hafi orðið eða hvar þetta mál sé á vegi statt.
Þarna er jafnframt vitnað í erfitt atvinnuástand í Hrísey. Ég átti þess kost að sitja fund, fjölmennan borgarafund í Hrísey ekki alls fyrir löngu, þar sem verið var að ræða atvinnumál þar og vanda Hríseyinga sem hefur skapast eftir að fiskvinnsla var lögð niður þar, eða eftir að KEA og Snæfell hættu þar rekstri fiskvinnslufyrirtækis. Það gerðist svo fljótlega og hefur gerst í framhaldi af því að bæði fiskvinnslufólk og sjómenn þar standa uppi atvinnulausir nánast með engum fyrirvara og verðmæti eigna þessa fólks hríðfellur ef ekki kemur eitthvað annað til í staðinn. Fram kom að á vegum hreppsnefndar hafi verið unnið að því að stofna nýtt sjávarútvegsfyrirtæki, m.a. með Snæfell og KEA og þar var mjög horft til þess hvort Hríseyjarhreppur mundi fá einhverja úthlutun af svokölluðum byggðakvóta, vísuðu þar á meðal til málefna Þingeyrar, að þar hafi tekist vel til. Það var eins og menn sögðu að ,,það vantaði gulrótina``, sem var byggðakvótinn, til að koma þessu betur af stað og koma slíkri atvinnustarfsemi í gang á ný.
Þess vegna, herra forseti, er þessi fyrirspurn lögð fram og eins og ég sagði vegna orða hv. þm. Kristins H. Gunnarssonar, formanns Byggðastofnunar, sem veit hvernig mál eru þarna og við vitum það reyndar öll. En hvar er þetta mál á vegi statt?