Árni Steinar Jóhannsson (andsvar):
Virðulegi forseti. Það er einmitt vegna þeirrar hröðu þróunar sem er í þessum málaflokki sem uppbyggingunni verður aldrei lokið. Þess vegna er málið svo eldfimt. Þetta er stöðug þróun og menn sjá ekki einu sinni fyrir hvað muni gerast á allra næstu missirum. Það er þess vegna sem Vinstri hreyfingin -- grænt framboð hefur viljað og vill beita sér fyrir því að fyrirtækið sé áfram og verði áfram í ríkiseign og það hefur margoft komið fram í dag. En ég vil spyrja hv. þm. að því sem samvinnumann og jafnaðarmann í Framsfl. hvað hv. þm. flokki undir sem stoðkerfi landsins. Hvar mun Framsfl. enda í þessum efnum? Við í Vinstri hreyfingunni -- grænu framboði flokkum símaþjónustuna og fjarskiptaþjónustuna undir stoðkerfi landsins. Við viljum ekki einkavæða stoðkerfi landsins.
Verður Framsfl. til að ríða á einkavæðingarbylgju gagnvart heilsugæslu, gagnvart sjúkrahúsum, gagnvart elliheimilum og öldrunarþjónustu, gagnvart menntuninni? Hvar á að enda? Þetta eru allt stoðkerfisdæmi sem við erum algerlega andvíg að einkavæða. Af því að þetta er uppi á borði hér væri gaman að fá skoðun þingmannsins á því hvar eigi að enda. Hvað er stoðkerfi?