Þuríður Backman (andsvar):
Herra forseti. Mig langar til að fá að heyra skoðun hv. þm. Péturs H. Blöndals á stöðu íslenskra garðyrkjubænda og hvort hann telji það einhvers virði að hér séu íslenskir bændur yfirleitt og af því að við erum að tala um garðyrkjubændur núna: Telur hann það einhvers virði fyrir íslenska þjóð og efnahagslíf að hér séu starfandi garðyrkjubændur? Telur hann að þeir séu í aðstöðu til að fara í samkeppni við innfluttar vörur vegna legu landsins, erfiðari skilyrði og það að landbúnaðarframleiðsla er niðurgreidd með ýmsu móti erlendis?