Steingrímur J. Sigfússon (andsvar):
Herra forseti. Þetta er alveg einstaklega ómaklegur og ómerkilegur málflutningur, en það er gott að hann skuli koma fram í ræðu hv. þm. Sjálfstfl., Kristjáns Pálssonar, því að það er þetta sem þingmenn stjórnarliðsins og forustumenn eru að segja hérna á göngunum og á götunni og eru að hringja í menn til þess að biðja þá að hlýða ekki kalli frá forustu sinni og félögum. Það er ágætt að fá hérna fram hvernig íhaldið, pólitíkin er að reyna að grafa í sundur samtök sjómanna til þess að veikja þá enn meir og koma þeim enn frekar á knén.
Og talandi svo um það að ríkisstjórnin sé heilög og með allt sitt á þurru. Hún frestaði deilunni með lögum þegar loksins var að komast skriður á viðræður fyrr í vetur ---- að eigin sögn --- og svo þekkjum við framhaldið. Og að ætla að halda því fram að sjómenn hafi þar með fengið að beita samtakamætti sínum í friði til þess að knýja á um lausna þessara mála er svo fráleitt að það tekur engu tali. Jafnvel hv. þm. Kristján Pálsson ætti ekki að reyna að segja það og er þá mikið sagt.