[prenta uppsett í dálka] 122. fundur, 126. lþ.
Ögmundur Jónasson (andsvar):
Herra forseti. Hæstv. sjútvrh. sagði að honum þætti þetta frv. hvorki gott né æskilegt að fá það fram. Nú er ríkisstjórninni í sjálfsvald sett hvað hún gerir. Maður skyldi ætla að hún gerði það eitt sem hún telur æskilegt miðað við aðstæður. Hún telur æskilegt, rétt og réttlætanlegt að setja lög á sjómenn, lög sem svipta þá samningsrétti í hálfan áratug.
Hæstv. sjútvrh. svaraði spurningu minni um hvernig hann ætlaði að axla ábyrgð gagnvart því fólki sem nú væri að fá ríkisstjórnarrýtinginn í bakið. Hæstv. ráðherra segir að hann axli ekki ábyrgð gagnvart einstökum hópum heldur gagnvart heildinni, gagnvart íslensku þjóðinni í heild sinni. Við höfum hins vegar haldið því fram að ríkisstjórnin sé ekki að axla ábyrgð sína gagnvart íslensku þjóðinni heldur að fara að fyrirmælum húsbænda sinna í Landssambandi ísl. útvegsmanna og skera þá niður úr þeirri snöru sem þeir sjálfir hafa komið sér í með ótrúlegri óbilgirni og þvergirðingshætti gagnvart íslenskum sjómönnum.
Ég spyr hæstv. ráðherra: Hvernig skýrir hann þann mun sem fram kom í málflutningi hans annars vegar og hæstv. félmrh. hins vegar, sem greinilega hafði ekki fengið frv. í hendur til að yfirfara það fyrr en í dag? Það er fyrst í dag sem sérfræðingar félmrn. fá ráðrúm til að kanna hvort málið standist alþjóðlegar skuldbindingar sem Íslendingar hafa undirgengist. Er ágreiningur um þetta efni í ríkisstjórninni? Ég óska eftir svörum.
