Ögmundur Jónasson (andsvar):
Herra forseti. Annars vegar hafa menn úr stjórnarandstöðunni bent á að nefndin, eða gerðardómurinn svokallaði, sé í reynd til málamynda. Það sé í reynd verið að þröngva vélstjórasamningnum upp á sjómenn. Þetta hafa menn úr stjórnarandstöðunni gagnrýnt. Hins vegar hef ég verið að gagnrýna gerðardóminn og að þessi nefnd eða gerðardómur skuli fá opinn tékka á að ákvarða kjör sjómanna.
En einu gleymir hv. þm. og það er grundvallaratriðið. Stjórnarandstaðan er algerlega einhuga í því að vísa þessu frv. í heild sinni til föðurhúsanna. Og hann er að leggja þetta upp á þá lund að hér sé einhver meiri háttar ágreiningur um það innan okkar raða hvernig eigi að orða frv. Stjórnarandstaðan er algerlega einhuga í því að þetta frv. beri að draga til baka í heild sinni. Sú er okkar afstaða og þar eru menn fullkomlega einhuga.