Þorgerður K. Gunnarsdóttir (andsvar):
Herra forseti. Fyrirgefðu, hv. þm., ef mér hefur orðið á í messunni við að telja nákvæmlega (Gripið fram í.) upp hvað skipasmíðastöðvarnar eru margar, herra forseti. Engu að síður fer ég ekkert ofan af því að í Vestmannaeyjum, þar sem verið er að koma á fót nýrri þurrkví, þar sem verið er að borga 53 milljónir á ári, er verið að ríkisstyrkja skipasmíðaiðnað sem berst í bökkum í dag. Ég spyr: Af hverju er réttlætanlegt að styrkja þessa framkvæmd í Vestmannaeyjum ef það hefur til að mynda ekki verið gert í Hafnarfirði? Hvar er jafnræðið þar?