Frsm. samgn. (Árni Johnsen) (andsvar):
Herra forseti. Hv. þm. ætti að vera kunnugt um það að einkaframkvæmdir eru ekki styrktar á hafnaáætlun. Það munar því. Þar velja menn sjálfir kostina og eiga kvölina og völina.
Líka má benda á að Reykjavíkurhöfn hefur verið að styrkja skipasmíðaiðnaðinn á sínu svæði með kaupum á mannvirkjum, styrkja verulega ákveðna þætti í skipasmíðum og skipaviðgerðum. Sama má segja til að mynda um Hafnarfjarðarhöfn. Hafnarfjörður hefur mjög góðar tekjur af höfninni í Straumsvík, verulegar og umtalsverðar tekjur sem eru á sinn hátt styrkur sem tengist beint hafnarmannvirkjunum á (Gripið fram í.) því svæði.