Einar Oddur Kristjánsson (andsvar):
Herra forseti. Ég vil líka minna á að það voru óskapleg vandræði þegar við vorum með þessi viðmið við lægstu taxta. Ég rakti það fyrr í kvöld í ræðu minni að þetta var til vandræða. Það vildi enginn viðurkenna þessa taxta og við lentum aftur og aftur í því að öll viðleitni til að bæta kjör þeirra sem voru á lægstu töxtunum voru eyðilagðir af því menn meintu ekkert með þessu.
Nú bið ég menn um að láta þessa taxta í friði, fara ekki að hugsa það upp á nýtt að miða við þá, vegna þess að þeir áfangar sem við höfum náð að undanförnu í kjarasamningum --- að hækka lægstu launin sérstaklega, nokkuð sem við ætluðum að gera fyrir 10, 20 árum en tókst ekki --- nú hefur okkur tekist það og þess vegna bið ég um að menn hafi það nú í friði og veri ekki að trufla neinar viðmiðanir við þessa taxta úr því við loksins gátum komist út úr þessari gryfju að liggja svona niðri með lægstu taxtana.