[prenta uppsett í dálka] 11. fundur, 126. lþ.
Hjálmar Jónsson (andsvar):
Herra forseti. Nauðsynlegt er að spyrja hv. þm. Steingrím J. Sigfússon að því hvort hann vilji breyta lögum um dómstóla og lögum um meðferð opinberra mála í þá veru að öll mál sem snerta kynferðisafbrot gagnvart börnum skuli fara fram í dómhúsi og þar með að skikka dómara alfarið til þess að heyja dómþingið í Barnahúsi.
Með breytingunni, sem lögð er til í frv. til laga sem hér er til umræðu, er um það talað að færa til fyrra horfs þar sem lögreglan tekur skýrsluna, væntanlega í Barnahúsi, sem er þó engin trygging fyrir heldur nema þá að breyta öðrum lögum þar um. Þá þarf að fara eftir segulbands- og vídeóupptökum af yfirheyrslu og rannsókn lögreglunnar. Þá er dómari ekki lengur með milliliðalausa vitnaleiðslu gagnvart barninu og öðrum málsaðilum í því máli. Mér er afar mikilvægt að réttaröryggi sé tryggt og ekki verði á grundvelli þess að til er Barnahús farið að líta á það sem aðalatriðið og við þurfum að lengja á milli dómarans, sem þarf að meta um trúverðugleikann, og málsaðilanna sem eru í mjög erfiðri aðstöðu og aðstæðum.
Ef hv. þm. vill breyta öllum þessum lögum og skylda menn til að fara í Barnahúsið hef ég varla heyrt aðra eins vitleysu.
