Lára Margrét Ragnarsdóttir:
Herra forseti. Ég var formaður nefndar um umferðaröryggismál sem umferðaröryggisáætlunin til ársins 2001 tekur til og sem hv. þm. og fyrirspyrjandi Steingrímur J. Sigfússon átti einnig sæti í og við áttum einstaklega góða samvinnu.
Þrátt fyrir að þau markmið sem sett voru á sínum tíma um að fækka alvarlega slösuðum og látnum niður í 200 manns þá langar mig til að benda á að við höfum enn ekki náð því markmiði, við erum örlítið yfir því markmiði og ástandið er enn þá algjörlega óásættanlegt. Þetta var mjög varlega gerð áætlun á þeim tíma. En í þessu sambandi langar mig líka til að geta þess að í ár hefur þeim tilvikum fækkað þar sem banaslys hafa orðið. En það er sorglegt og jafnframt viðvörun um að enn hafi ekki nóg verið að gert að fjöldi látinna í hverju slysi hefur aukist. Ég vænti þess að umferðaröryggisáætlun sjái dagsins ljós á næsta ári og að betri framkvæmd náist fram en verið hefur hingað til og við munum vera í stöðugri endurskoðun eins og verið hefur.