Jón Bjarnason:
Herra forseti. Ég vissi ekki að við værum komin inn á einhvern borgarstjórnarfund í Reykjavík með þátttöku þingmanna úr öðrum bæjarfélögum. En það er gott. Vissulega er afar nauðsynlegt að styrkja umferð, styrkja öryggi í umferðinni á höfuðborgarsvæðinu. Það er afar brýnt.
Ég vil þó hér á þeim stutta tíma sem ég hef draga fram þátt almenningssamgangnanna. Ég hefði viljað sjá, herra forseti, að það lægi fyrir gott skipulag í almenningssamgöngum sem ekki aðeins næði til Reykjavíkur heldur einnig til nágrannasveitarfélaga, til Kópavogs, til Garðabæjar, til Hafnarfjarðar, til Mosfellsbæjar og út á Seltjarnarnes. Það væri svona heildarstefna í almenningssamgöngum sem jafnframt væri hluti af skipulögðu almenningssamgangnaneti við aðra hluta landsins þannig að almenningssamgöngur á höfuðborgarsvæðinu nytu forgangs í umferð. Það væri í skipulaginu gert ráð fyrir því að strætisvagnar ættu forgangsbrautir til að fara um og almenningssamgöngur væru efldar. Það er líka vistvæn borgarumferð. Ég hefði viljað sjá af hálfu samgrn. í samvinnu við öll sveitarfélög á höfuðborgarsvæðinu samræmda, sterka og metnaðarfulla áætlun í almenningssamgöngum sem hrifi.