[prenta uppsett í dálka] 18. fundur, 126. lþ.
Rannveig Guðmundsdóttir:
Herra forseti. Þetta gengur ekki. Hér var farið í umræðu utan dagskrár um stórpólitískt og alvarlegt þjóðfélagsmál, eins og fram hefur komið, þ.e. lokun framhaldsskólanna. Menn hafa sett sig á mælendaskrá og ekki hægt að lengja hana. Í einni af síðustu ræðunum kemur þingflokksformaður Sjálfstfl. og lýsir því yfir að í gær hafi verið bornar fram vitlausar spurningar sem sé ekki hægt að svara og í dag tekin upp umræða sem eigi ekki að taka fyrir hér í þinginu. Þegar þingmenn bregðast við þessum ummælum um leið og þeir geta, herra forseti, þegar settur hefur verið nýr fundur, þá slær forseti með dæmalausum hætti á þá umræðu. Það er sjálfsagt að bera fram þá spurningu sem hv. þm. Guðmundur Árni Stefánsson hefur borið fram til forseta. Ég ætlast til að forseti svari henni.
