[prenta uppsett í dálka] 18. fundur, 126. lþ.
Sigríður Jóhannesdóttir:
Hæstv. forseti. Ég fagna því að þessi fsp. skuli hafa komið fram því ég held að þetta sé mál sem er full þörf á að ræða. Það er í sjálfu sér gleðilegt að hér skuli hafa komið fram að hæstv. menntmrh. er meðvitaður um málið og að unnið sé að ýmsum athugunum á þessu í kerfinu. Ég verð samt að segja að undanfarið hafa borist ýmsar fréttir af atferli og gengi drengja í skólum landsins sem hafa vakið áhyggjur, a.m.k. hjá mér sem gömlum kennara, um að neikvæð þróun sé í gangi í þessum málum. Ég held, þó vissulega beri að þakka það sem vel er gert, að ástæða sé til að hnykkja á og efla enn rannsóknir og tilraunir í þessum málum. Ég tel ástæðu til að ætla að að mörgu leyti megi koma í veg fyrir þessa neikvæðu þróun með því að kenna kynjunum aðskildum, þó svo verði ekki gert að öllu leyti.
