Fyrirspyrjandi (Þórunn Sveinbjarnardóttir):
Hæstv. forseti. Á þskj. 96 er spurt hvort hæstv. samgrh. hafi látið meta framlag kvenna til ferðaþjónustu. Fyrirspurnin er lögð fram til þess að fylgja eftir þingsályktun Alþingis um framkvæmdaáætlun til fjögurra ára um að aðgerðir til þess að jafna stöðu kynjanna. Þar segir í lið 10.1, með leyfi forseta, en liðurinn ber yfirskriftina Konur sem atvinnurekendur í ferðaþjónustu:
,,Framlag kvenna til ferðaþjónustu verður metið í ljósi þess að ferðaþjónustan skiptir sífellt meira máli fyrir bæði atvinnustig í landinu og tekjur almennt. Markmið þessarar úttektar verður að kanna hvernig konur og karlar koma að þessari vaxandi atvinnugrein og að þá verði hægt að meta hvort og þá hvernig breytingar eða sérstakar stuðningsaðgerðir gagnist konum sem körlum.``
Því spyr ég hæstv. samgrh. hvort þetta mat hafi verið gert á vegum á vegum samgrn. og hverjur séu niðurstöður þess. Liggi niðurstöðurnar ekki fyrir væri fengur í því að vita á hvaða stigi matið sé eða vinnan sé og hvenær niðurstaðna úr henni sé að vænta.
Herra forseti. Ferðaþjónustan er í örum vexti hér á landi. Því er spáð að erlendum ferðamönnum fjölgi um 17% á milli 1999 og 2000 og ekkert lát virðist á þeirri þróun. Einnig hafa ferðalög Íslendinga innan lands færst mjög í vöxt. En það er ljóst að ferðaþjónustan er ekki einvörðungu mikil uppspretta gjaldeyristekna fyrir þjóðarbúið heldur einnig gott sóknarfæri kvenna í atvinnurekstri ef rétt er á málum haldið, ekki síst í dreifbýli þar sem atvinna kvenna er mun fábreyttari en gerist í þéttbýli og veldur því m.a. að tækifæri kvenna á landsbyggðinni eru ekki þau sömu og tækifæri karlanna. Margvíslegir möguleikar eru enn vannýttir í íslenskri ferðaþjónustu. Heilsuferðaþjónusta er enn á byrjunarstigi ef svo má segja, græn ferðamennska er líka óplægður akur að mestu leyti. Æ fleiri nýta sér kosti menningartengdrar ferðaþjónustu og ljóst er að hún hefur víða eflt þessa atvinnugrein svo um munar.
Herra forseti. Að þessu sögðu er ljóst að framlag kvenna til ferðaþjónustu þarfnast skoðunar ásamt því að meta stöðu kynjanna í atvinnugreininni.