Ögmundur Jónasson (andsvar):
Herra forseti. Hv. þm. vísaði í tilskipanir Evrópusambandsins og lög þar. Tilskipun 97/66 frá Evrópusambandinu er svohljóðandi, með leyfi forseta:
,,Aðildarríkin skulu með landslögum tryggja trúnað í samskiptum sem fara um almenn fjarskiptakerfi svo og í þjónustu sem býðst almenningi um slík fjarskiptakerfi. Einkum og sér í lagi skulu aðildarríkin banna öðrum en notendum`` --- öðrum en notendum --- ,,hlerun, upptöku, geymslu eða annars konar inngrip í eða eftirlit með fjarskiptum liggi ekki fyrir samþykki notenda í hverju tilfelli, nema slíkt sé sérstaklega heimilað í lögum.``
Hér er greinilega verið að vísa til hlerunar á símtölum. Hér er verið að vísa til annarra en þeirra sem þátt taka í samtalinu. Þetta er bann við hlerun en ekki við því að fréttamenn notfæri sér segulbandstæki sem vinnutæki í hagræðingarskyni.