Tómas Ingi Olrich (andsvar):
Herra forseti. Heimsmynd NATO er ekki hrunin meira en svo að NATO er enn þá samnefnari flestra Evrópuþjóða í öryggismálum. Þrjár Mið-Evrópuþjóðir eru gengnar í samtökin, Tékkland, Pólland og Ungverjaland. Baltnesku löndin knýja á um inngöngu því þau telja sína stöðu ótrygga og vilja tryggja sig með inngöngu í þetta varnarbandalag og fleiri ríki knýja á um inngöngu. Það er því ljóst að í grundvallaratriðum hefur ekkert breyst í þeirri breyttu mynd sem kom upp eftir 1990 að í augum flestra Evrópuríkja er Atlantshafsbandalagið bandalag sem tryggir frið og öryggi í Evrópu.