Halldór Blöndal:
Herra forseti. Það er kannski langt teygst að velja sér þessa leið en óhjákvæmilegt er fyrir mig að leiðrétta ummæli sem ég hafði fyrr í dag í sambandi við skýrslu umboðsmanns Alþingis þar sem ég vitnaði til laga um skipulag ferðamála. Mér varð á að vitna þar til greina sem höfðu komið inn í lögin á árinu 1998, eru nr. 73/1998, í stað eldri greinar sem hljóðar svo:
,,Ferðaskrifstofa, eða samtök slíkra fyrirtækja, skal setja tryggingu fyrir endurgreiðslu fjár sem greitt hefur verið og fyrir greiðslu kostnaðar við heimflutning neytandans ef til gjaldþrots eða rekstrarstöðvunar viðkomandi ferðaskrifstofu kemur.``
Þessi grein skýrir niðurstöðu umboðsmanns Alþingis, herra forseti.