Ögmundur Jónasson (andsvar):
Herra forseti. Þetta er ekkert annað mál. Við erum að tala um áherslur íslensku ríkisstjórnarinnar í skattamálum. Við vitum hverjar þær hafa verið á umliðnum árum. Þær hafa gengið út á að hygla fjármagnseigendum og stórfyrirtækjum á kostnað almennings. Á sama tíma og verið er að fella niður skatta á fyrirtæki og fjármagnseigendur eða draga stórlega úr þeim eru auknar skattaálögur á almenning, ekki bara útsvarið heldur margvísleg notendagjöld, inni í skólakerfinu, inni í heilbrigðiskerfinu, og dregið úr stuðningi við aldraða og öryrkja. Ég er að segja að það er ekki forgangsverkefni á Íslandi að draga enn úr skattbyrði fyrirtækja og fjármagnseigenda. Forgangsverkefni á Íslandi er að styrkja stöðu almenns launafólks og styrkja stoðir velferðarþjónustunnar í landinu.