Fjáraukalög 2000

[15:46]

Frsm. meiri hluta fjárln. (Jón Kristjánsson):

Herra forseti. Ég mæli fyrir áliti meiri hluta fjárln. um frv. til fjáraukalaga fyrir árið 2000.

Nefndin hefur haft frumvarpið til athugunar og í því skyni leitað skýringa hjá fjármálaráðuneyti og fagráðuneytum varðandi beiðnir um auknar fjárheimildir.

Afgreiðsla frv. til fjáraukalaga er nú nokkuð fyrr á ferðinni en áður. Er það í samræmi við þær áætlanir sem hafa verið settar um að flýta umræðu um fjáraukalög og fjárlög frá því sem áður hefur verið. Við höfum unnið að því hörðum höndum í fjárln. að standast þessar áætlanir og ég vona að það takist.

Meiri hluti fjárlaganefndar gerir 42 breytingartillögur við frumvarpið sem samtals nema 2.063,7 millj. kr. til hækkunar. Einstakar tillögur eru skýrðar í nefndarálitinu auk þess sem fjallað verður nánar um þær í framsögu.

Með þessum tillögum til hækkunar er gjaldaaukning samkvæmt frv. 5,7 milljarðar kr.

Nokkur atriði standa út af og þar eru stærst að nefndinni vannst ekki tími til að fjalla um heilbrigðismál til hlítar fyrir þessa umræðu en mun hugsanlega leggja fram breytingartillögu varðandi þau við 3. umr. en nú er unnið að því að móta tillögur í þeim efnum.

Þetta fjáraukalagafrv. í heild felur í sér nokkrar stórar ákvarðanir um útgjöld og þessi útgjaldaaukning skýrist af þeim. Annað er að mestu leyti leiðréttingar og framreikningur. Hins vegar eru þessar stóru upphæðir kostnaður vegna sendiráða eins kom fram í frv. og var rætt við 1. umr. Það eru ákvarðanir varðandi Jöfnunarsjóð sveitarfélaga. Það er reiknað með 700 millj. kr. framlagi í jöfnunarsjóðinn í samræmi við tillögur tekjustofnanefndar. Tryggingagjöld hafa vaxið og endurmat á vaxtagjöldum felur í sér útgjöld upp á hálfan milljarð eða 500 millj. kr. eins og ég kem að síðar.

Ég mun nú rekja breytingartillögurnar og þær skýringar sem þeim fylgja. Fyrst er til að taka æðstu stjórn ríkisins eða embætti forseta Íslands. Gerð er tillaga um 3,4 millj. kr. viðbótarfjárheimild vegna halla sem myndast hefur á árunum 1999--2000 vegna hærri stjórnunarkostnaðar og meiri kostnaðar við opinberar heimsóknir en gert hafði verið ráð fyrir. Einnig er lögð til 11,6 millj. kr. hækkun á fjárheimild vegna halla við opinberar heimsóknir. En 3,4 millj. eru vegna hærri stjórnunarkostnaðar.

Alþingi. Alþingiskostnaður. Lagt til að fjárveiting til Alþingis verði aukin um 13 millj. kr. vegna aukins ferðakostnaðar innan lands í kjölfar stækkunar á kjördæmum.

Alþjóðasamstarf. Gerð er tillaga um 4 millj. kr. til að mæta útgjöldum af meiri erlendum samskiptum en áður var gert ráð fyrir.

Sérverkefni. Lögð er til 13 millj. kr. hækkun á fjárheimild til að mæta ófyrirséðum út gjöldum vegna aðstöðu í tengslum við þingfund á kristnihátíð á Þingvöllum.

Fasteignir. Gerð er tillaga um 83 millj. kr. aukafjárveitingu vegna stofnkostnaðar við húsnæði Alþingis. Í fjárlögum fyrir árið 2000 er 113 millj. kr. framlag sem ætlað var til framkvæmda við innréttingar og til kaupa á búnaði á 2.--5. hæð í Austurstræti 8--10 og 2. hæð í Austurstræti 10A. Fyrirhugað er að flytja alla starfsemi fastanefnda þingsins og hluta af skrifstofum alþingismanna í þetta húsnæði. Ætlunin er að ljúka því innan tíðar.

Forsætisráðuneyti. Ritun sögu Stjórnarráðsins. Gerð er tillaga um 3,9 millj. kr. aukafjárveitingu vegna kostnaðar við ritun á sögu Stjórnarráðsins. Ritnefnd hefur ákveðið tilhögun verksins, ráðið höfunda og áætlað annan kostnað við verkið.

Gerð er tillaga um 16 millj. kr. aukaframlag vegna kostnaðar við kristnihátíð, en nú liggja fyrir fyrstu drög að uppgjöri fjármála hátíðarinnar. Skýrist frávikið fyrst og fremst af hærri kostnaði við framkvæmdir en áætlað hafði verið. Hluti af þeim kostnaði er vegna mannvirkja sem upphaflega stóð til að yrðu eingöngu til nota yfir hátíðina, en ákveðið var að þau yrðu varanleg til gagns fyrir þá sem heimsækja þjóðgarðinn á Þingvöllum.

Gerð er tillaga um 4,9 millj. kr. fjárveitingu til landafundanefndar til lokauppgjörs á uppbyggingu Þjóðhildarkirkju og bæjar Eiríks rauða í Brattahlíð á Grænlandi en mannvirkin voru vígð og afhent grænlensku heimastjórninni á landafunda- og kristnitökuhátíð þar um miðjan júlí sl. Gengisþróun undanfarin ár hefur verið verkefnunum óhagstæð miðað við upphaflega áætlun. Umframkostnaður frá upphaflegum verksamningi kom til vegna þess að lengra var gengið í framkvæmdum en upphaflega stóð til.

Ýmis verkefni. Gerð er tillaga um 2 millj. kr. aukaframlag í samræmi við tillögur nefndar sem forsætisráðherra skipaði 1999 til fjalla um stuðning stjórnvalda við handverksgreinar.

Menntamálaráðuneyti. Gerð er tillaga um 90 millj. kr. hækkun á framlagi til kennslu í Háskóla Íslands. Fjárveiting ársins 2000 miðaðist við 3.888 nemendaígildi á síðasta skólaári en skólinn hefur tilkynnt að þau hafi reynst 4.264 og að samkvæmt samningi við menntamálaráðuneytið vanti um 200 millj. kr. til að mæta útgjaldaaukanum. Í fjárlögum er gert ráð fyrir 229,5 millj. kr. á lið 02-299 til að ljúka samningum við háskóla, nemendafjölgun og tilfærslu nemenda á milli reikniflokka náms og er framlagið til viðbótar því.

Byggða- og minjasöfn. Lagt er til að Minjasafn Egils Ólafssonar, Hnjóti, fái 0,6 millj. kr. aukafjárveitingu til reksturs safnsins. Styrkur frá þjóðminjaráði vegna launa safnstjóra og sérverkefna varð um 1,2 millj. kr. lægri en gert var ráð fyrir í fjárhagsáætlun.

Þjóðleikhús. Gerð er tillaga um 66 millj. kr. aukafjárveitingu til þess að Þjóðleikhúsið geti gert upp skuld sína við B-deild Lífeyrissjóðs starfsmanna ríkisins vegna hlutdeildar í lífeyrishækkunum fyrrverandi starfsmanna. Í fjárlagafrumvarpi 2001 er lagt til að leikhúsið verði gert að A-hluta stofnun.

Sinfóníuhljómsveit Íslands. Lagt er til að hljómsveitinni verði bættur 1,5 millj. kr. tekjumissir vegna niðurfellingar á skemmtanaskatti á miðju árinu 1998.

Alþjóðleg samskipti. Aðildargjöld ESB. Lagt er til að veitt verði 10,2 millj. kr. viðbótarframlag vegna hækkunar á aðildargjöldum. Í fjárlögum er gert ráð fyrir 242,8 millj. kr. til greiðslu á aðildargjöldum vegna þátttöku Íslendinga í samstarfsáætlunum Evrópusambandsins en endurskoðuð áætlun gerir ráð fyrir að þau muni nema 267,4 millj. kr. Ónotuð fjárheimild frá 1999 nemur 14,4 millj. kr. þannig að 10,2 millj. kr. vantar til að endar nái saman.

Gerð er tillaga um 4,7 millj. kr. aukafjárveitingu til Gunnarsstofnunar, sem hóf starfsemi sína að Skriðuklaustri sl. sumar, til að standa straum af ýmsum óvæntum kostnaði sem hefur fallið til við að hefja starfsemi stofnunarinnar.

Lagt er til að veitt verði 18 millj. kr. aukaframlag vegna umframkostnaðar við heimssýninguna í Hannover. Í fjáraukalagafrumvarpi 2000 er tillaga um 20 millj. kr. fjárveitingu sem sett var fram með fyrirvara um breytingar þegar endanlegt uppgjör lægi fyrir, m.a. með tilliti til sölu á íslenska skálanum. Tekist hefur að selja íslenska skálann til danska fyrirtækisins Danfoss fyrir samtals 45,7 millj. kr. en samkvæmt fyrirliggjandi tölum um kostnað af heimssýningunni stefnir í að hann verði 38 millj. kr. umfram það sem áætlað var.

Lögð er til 23 millj. kr. hækkun á fjárheimild vegna uppgjörs á byggingarkostnaði sendiráðs Íslands í Berlín. Samkvæmt upplýsingum frá Framkvæmdasýslu ríkisins er hér um lokagreiðslu að ræða með þeim fyrirvara þó að enn er ekki kominn lokareikningur frá einum verktaka, auk þess sem enn er deilt um endanlegt uppgjör í tveimur málum.

Gerð er tillaga um 7,2 millj. kr. fjárveitingu til Skógræktarfélags Íslands vegna framkvæmdarsamnings við landbúnaðar- og fjármálaráðuneyti um Landgræðsluskóga og átaks um aldamótaskóga.

Gerð er tillaga um 5,5 millj. kr. fjárveitingu til að standa straum af endurbótum á húsnæði yfirdýralæknis til dýrasjúkdómarannsókna.

Landbúnaðarháskólinn á Hvanneyri í Borgarfirði. Lagt er til að veitt verði 20 millj. kr. fjárveiting til að koma til móts við uppsafnaðan rekstrarhalla skólans í trausti þess að áfram verði unnið að varanlegri lausn á fjárhagsvanda stofnunarinnar. Á yfirstandandi ári hefur verið gripið til nokkurra hagræðingaraðgerða, svo sem breytinga á búrekstri og minni eignakaupa. Gert er ráð fyrir að áfram verði haldið á þeirri braut.

Gerð er tillaga um 5,7 millj. kr. aukafjárveitingu til Suðurlandsskóga til að mæta kostnaði við skógræktaráætlanir. Ákveðið var á síðasta ári að slíkur kostnaður skyldi ekki greiddur af Skógrækt ríkisins eins og verið hafði og varð þá ljóst að ekkert fjármagn yrði til að greiða hann en bindandi trjáplöntusamningar höfðu þá þegar verið gerðir.

Gerð er tillaga um 7,7 millj. kr. aukafjárveitingu vegna reksturs rannsóknarskipa Hafrannsóknastofnunar. Í rekstraráætlun var gert ráð fyrir að olíukostnaður í rekstri skipanna yrði 20 millj. kr. á árinu 2000. Vegna hækkana á olíuverði var kostnaðurinn fyrstu átta mánuði ársins orðinn um 22 millj. kr. og til áramóta má búast við að kostnaðurinn verði 7,7 millj. kr. hærri á árinu en áætlanir gerðu ráð fyrir.

Gerð er tillaga um 6 millj. kr. aukafjárveitingu til Keldnaholts vegna hækkana á gjöldum umfram forsendur fjárlaga vegna reksturs á húseignum í Keldnaholti. Um er að ræða kostnað vegna rafmagns, hita og ræstinga, svo og fasteignagjöld og opinber gjöld.

Lagt er til að veitt verði 5 millj. kr. aukafjárveiting til Persónuverndar til að mæta kostnaði við að setja reglur um öryggi persónuupplýsinga í lífsýnasöfnum. Ekki var gert ráð fyrir þessu verkefni í frumvarpi til laga um persónuvernd en sú breyting var gerð á frumvarpinu í meðförum Alþingis. Að mati stjórnar Persónuverndar er óhjákvæmilegt að fá erlenda sérfræðinga til að vinna verkið til að tryggja sérþekkingu á þeim staðli sem notaður verður. Samkvæmt verðkönnun hjá erlendu ráðgjafarfyrirtæki má ætla að kostnaðurinn geti numið um 5 millj. kr.

Lagt er til að framlag til tölvumiðstöðvar dómsmálaráðuneytisins verði aukið um 2,5 millj. kr. í kjölfar samnings sem gerður var við Skráningarstofuna hf. um rekstur miðstöðvarinnar.

[16:00]

Ríkissáttasemjari. Gerð er tillaga um 8 millj. kr. viðbótarfjárveitingu vegna aukins kostnaðar í tengslum við umfangsmikla kjarasamningagerð á árinu.

Lögð er til 5,3 millj. kr. hækkun á fjárveitingu til meðferðarheimilisins að Torfastöðum í kjölfar skattkröfu sem rekstraraðila meðferðarheimilisins hefur verið úrskurðað að greiða vegna áranna 1992--1996 og ekki var áætlað fyrir.

Í kjölfar samkomulags milli ríkis og sveitarfélaga og tillagna tekjustofnanefndar er gerð tillaga um 700 millj. kr. tímabundna viðbótarfjárveitingu til Jöfnunarsjóðs sveitarfélaga sem ráðstafað verði með líkum hætti og sambærilegt framlag árið 1999. Framlaginu er ætlað að koma til móts við vanda sveitarfélaga sem hafa ekki möguleika á að draga úr rekstri og þjónustu til samræmis við fækkun íbúa og samdrátt í tekjum.

Lögð er til 7,6 millj. kr. viðbótarfjárveiting til að endurgreiða sveitarfélögum uppsafnaða skuld vegna félagsþjónustu við erlenda ríkisborgara, sbr. 15. gr. laga um félagsþjónustu sveitarfélaga, nr. 40/1991, og myndast hefur á árinu 1999. Í lögunum er kveðið á um að ríkissjóður endurgreiði sveitarfélagi veitta aðstoð vegna erlendra ríkisborgara sem ekki eiga lögheimili í landinu eða hafa átt lögheimili skemur en í tvö ár. Aðstoðin skal veitt af dvalarsveitarfélagi að höfðu samráði við félmrn., enda hafi áður verið leitað eftir aðstoð frá heimalandi.

Gerð er tillaga um 57,2 millj. kr. fjárveitingu til greiðslu skuldar við Tryggingastofnun ríkisins vegna lögbundinnar skyldu félmrn. til að greiða meðlög, sbr. 25. gr. barnalaga, nr. 20/1992. Þar er kveðið á um að Tryggingastofnun ríkisins sé skylt að greiða foreldri barns, sem á framfærslurétt hér á landi, framfærslueyri með barni samkvæmt lögmætum úrskurði eða staðfestum samningi, þó innan þeirra marka er greinir í almannatryggingalögum. Hafi foreldrar barns fengið skilnað erlendis og svo háttar til að því foreldri, sem ekki hefur forsjá barns, hefur verið gert að greiða lægra meðlag með því en nemur barnalífeyri almannatrygginga eða hefur ekki verið gert að greiða meðlag með því getur sýslumaður úrskurðað meðlag til forsjárforeldris á hendur Tryggingastofnun ríkisins á grundvelli erlends skilnaðarleyfis, skilnaðardóms eða úrskurðar. Ríkissjóður endurgreiðir þessar fjárhæðir, en Innheimtustofnun sveitarfélaga innheimtir þær eftir því sem fært reynist.

Gerð er tillaga um að veita Foreldra- og styrktarfélagi Öskjuhlíðarskóla 4 millj. kr. framlag til rekstrar félagsins á sumardvöl fyrir nemendur skólans, en halli hefur verið á rekstrinum síðustu ár. Eftir reksturinn sl. sumar er enn halli sem nemur um 4 millj. kr.

Lagt er til að Byrgið, kristilegt líknarfélag, fái 9,5 millj. kr. aukafjárveitingu. Gerður var samningur um að Byrgið fengi til afnota aflagða ratsjárstöð á Miðnesheiði sem gengið hefur undir nafninu Rockville. Húsin þar voru illa farin og enn hefur ekki tekist að ganga þannig frá að unnt sé að reka þá starfsemi á staðnum sem ætlað er en til stóð að taka húsin í notkun sl. haust. Meðal annars þurfti miklar lagfæringar við lagnir sem talið hafði verið að væru í lagi, sömuleiðis þurfti endurbætur á frárennsli og rafmagni. Þá hefur verið gerð krafa um að öll hús verði teiknuð upp og málsett samkvæmt íslenskum stöðlum.

Gerð er tillaga um 175 millj. kr. hækkun á framlagi til lyfjamála. Endurmat á útgjöldum til lyfjamála eftir tíu mánuði bendir til þess að útgjöld málaflokksins verði 4.765 millj. kr. á árinu 2000. Útgjaldaspáin hefur hækkað um 175 millj. kr. frá því í sumar vegna hærri útgjalda á haustmánuðum en ráð var fyrir gert.

Gerð er tillaga um 30 millj. kr. lækkun framlags í ljósi endurmats á útgjöldum við þjálfun.

Lögð er til 25 millj. kr. lækkun framlags í ljósi endurmats á útgjöldum við tannlækningar.

Lagt er til að veitt verði 35 millj. kr. aukaframlag til að mæta umframkostnaði við verklok á nýrri barnadeild Fjórðungssjúkrahússins á Akureyri sem fyrirhugað er að opna í nóvember á þessu ári.

Lagt er til að millifærð verði 20,6 millj. kr. fjárheimild frá Landspítala til Heilsuverndarstöðvarinnar vegna flutnings verkefna. Mæðravernd Landspítalans við Hringbraut var sameinuð mæðravernd Heilsuverndarstöðvarinnar 1. október 1999. Launakostnaður frá 1. október 1999 til 31. desember 2000 nemur 20,6 millj. kr.

Ýmis skipulags- og rekstrarverkefni. Lagt er til að 6,7 millj. kr. af ónýttri fjárveitingu til reksturs hjúkrunarheimilisins Sóltúns árið 2000 verði millifærðar á þennan lið til reksturs tímabundinnar hjúkrunardeildar og sjúkrahústengdrar heimahlynningar fyrir aldraða. Sú starfsemi verður lögð niður í árslok 2001 þegar Sóltún tekur til starfa.

Lagt er til að 5,1 millj. kr. hluti af ónýttri fjárveitingu til reksturs hjúkrunarheimilisins Sóltúns árið 2000 verði millifærður til reksturs tveggja nýrra hjúkrunarrýma í Skógarbæ til að mæta brýnni þörf á hjúkrunarrýmum á höfuðborgarsvæðinu.

Nýtt hjúkrunarheimili í Reykjavík. Gerð er tillaga um 23,6 millj. kr. lækkun á þessum lið. Um er að ræða fjárveitingu sem ætluð var til reksturs hjúkrunarheimilisins Sóltúns árið 2000 en starfsemi þess mun ekki hefjast fyrr en í lok árs 2001. Eins og fyrr greinir er lagt til að hluti fjárhæðarinnar, 5,1 millj. kr., verði millifærður til reksturs tveggja nýrra hjúkrunarrýma eins og áður hefur verið gerð grein fyrir.

Lagt er til að millifærð verði 20,6 millj. kr. fjárheimild frá Landspítala til Heilsuverndarstöðvarinnar vegna flutnings verkefna. Ég hef áður gert grein fyrir því máli.

Gerð er tillaga um 1,3 millj. kr. aukaframlag til Forvarnasjóðs til greiðslu biðlauna til fyrrverandi starfsmanna áfengisvarnaráðs.

Forvarnasjóður. Gerð er tillaga um að Gamla apótekið, menningar- og kaffihús ungs fólks á Vestfjörðum, fái 2,5 millj. kr. framlag á fjáraukalögum fyrsta rekstrarár sitt. Markmiðið með starfsemi hússins er að reyna að auka skilning og vitund ungs fólks á því að hægt sé að skemmta sér og stunda menningar- og listalíf án neyslu áfengis og annarra vímuefna.

Samgrn. innheimtir, á grundvelli reglna um bókhald, reikningsskil og upplýsingagjöf ferðaskrifstofa nr. 530/1998, gjald að upphæð 30 þús. kr. af ferðaskrifstofum og ferðaskipuleggjendum til að standa straum af kostnaði við eftirlit með starfsemi þeirra. Gjaldið rennur í ríkissjóð og er farið fram á ráðstöfun þess á móti áföllnum kostnaði í samræmi við lög. Fjármögnun tillögunnar er sett fram í fyrirliggjandi frv. sem viðskiptahreyfing en á að vera greiðsla úr ríkissjóði og er gerð tillaga um það til leiðréttingar. Fjárveiting er hins vegar óbreytt.

Gerð er tillaga um að Slysavarnafélagið Landsbjörg fái 7,4 millj. kr. fjárveitingu til að standa straum af kostnaði við notkun þyrlna við æfingar Slysavarnaskóla sjómanna. Reikningar hafa safnast upp vegna þessara æfinga. Landhelgisgæslan hóf árið 1994 að innheimta hjá skólanum greiðslur fyrir notkun þyrlna við æfingar skólans en ekki hafði verið gert ráð fyrir þessum auknu útgjöldum vegna æfinganna.

Vegagerðin. Lögð er til 100 millj. kr. hækkun á fjárveitingu til nýframkvæmda vegna verðhækkana á olíu. Um nokkurra ára skeið hefur gilt sú regla við útboð hjá Vegagerðinni að ekki eru greiddar verðbætur á verk sem taka styttri tíma en tvö ár. Verðsveiflur á aðföngum verktaka hafa ekki verið miklar og hefur þessi tilhögun því ekki sætt gagnrýni. Í júní sl. kom til framkvæmda breyting á þungaskattskerfinu sem leiddi til hækkunar á gjaldi vegna hluta þungra bíla. Miðað við notkun hjá verktökum almennt má reikna með að breytingin hafi leitt til hækkunar. Aðföng verktaka hafa einnig hækkað nokkuð á þessu ári en olían þó allra mest. Verð dísilolíu hækkaði um 77% frá júní 1999 til október 2000. Mjög veigamiklar ástæður þarf til að réttlæta breytingu á ákvæðum útboðsgagna, t.d. varðandi verðlagsákvæði, eftir að samningar eru gerðir en vegna þessara hækkana sem eru langt umfram það sem vænta mátti telst ekki hjá því komist að taka tillit til þeirra og hefur Vegagerðin sett nánari reglur um hvernig að útreikningi bóta skuli staðið.

Gerð er tillaga um 8 millj. kr. aukafjárveitingu til að gera upp 8 millj. kr. skuld Grenivíkurhafnar við Grýtubakkahrepp. Þegar Hafnasamlag Norðurlands var stofnað fyrir tæpum fjórum árum tók samgrn. þátt í undirbúningsvinnu við það. Kom þá fljótlega í ljós að Grenivíkurhöfn skuldaði Grýtubakkahreppi rúmar 12 millj. kr. og ákvað ráðuneytið að greiða hluta skuldarinnar, eða 8 millj. kr., til að liðka fyrir sameiningu og er þetta sú greiðsla.

Póst- og fjarskiptastofnunin. Lagt er til að veitt verði 10 millj. kr. aukafjárveiting þar sem álagning jöfnunargjalds vegna alþjónustu hófst ekki fyrr en um mitt ár 2000. Í frv. til laga um jöfnunargjald á alþjónustu sem samþykkt var sem lög á vorþingi 2000 var áætlað að álagning jöfnunargjalds skilaði 20 millj. kr. í tekjur á ári. Hins vegar öðluðust lögin ekki gildi fyrr en um mitt ár 2000 og því er ekki gert ráð fyrir nema 10 millj. kr. í tekjur á árinu 2000. Neyðarlínan hf. hefur gert samning við dómsmrn. um að veita alþjónustu og gerir ráð fyrir 20 millj. kr. kostnaði við þjónustuna. Því er farið fram á 10 millj. kr. fjárveitingu til verkefnisins í þetta eina skipti.

Gerð er tillaga um 3 millj. kr. fjárveitingu til Upplýsingamiðstöðvar ferðamála í Leifsstöð en hún hefur síðan 1997 fengið 3 millj. kr. framlag af fjárlögum. Þessi fjárveiting féll niður á fjárlögum 2000. Ferðamálasamtök Suðurnesja hafa séð um rekstur stöðvarinnar með samningi við Ferðamálaráð.

Gerð er tillaga um 20,3 millj. kr. aukafjárveitingu vegna stofnbúnaðar og innréttinga í nýju húsnæði Löggildingarstofunnar við Borgartún. Þá hefur kostnaður við sameign reynst meiri en gert var ráð fyrir í upphaflegri húslýsingu. Framlag þetta er til að mæta útgjöldum við breytingar á húsnæðinu sem framkvæmdar eru á vegum Fasteigna ríkissjóðs.

Hagstofa Íslands, aðalskrifstofa. Lagt er til að veitt verði 35 millj. kr. viðbótarframlag til að mæta ófyrirséðum kostnaðarauka í rekstri Hagstofunnar sem er í fyrsta lagi tilkominn vegna gerðar nýs tölvukerfis þjóðskrár og fyrirtækjaskrár og breytinga eldri kerfa. Þessar breytingar reyndust flóknari og tímafrekari en áætlað var. Einnig hefur verið talið nauðsynlegt að vinna áfram að þróun og endurbótum á gerð nýs kjörskrárkerfis. Kostnaður af framantöldu umfram áætlanir nemur um 15 millj. kr. á árunum 1999 og 2000. Í öðru lagi hefur breytingin valdið því að ráðgerð hagræðing af rekstri nýs kerfis skilaði sér ekki fyrr en á seinni hluta þessa árs. Við það urðu útgjöld Hagstofunnar um 10 millj. kr. meiri en áætlað var. Í þriðja lagi hafa tekjur Hagstofunnar af afnota- og vinnslugjöldum þjóðskrár dregist saman og eru horfur á að þar muni um 10 millj. kr. frá áætlun fjárlaga.

Umhvrn., aðalskrifstofa. Gerð er tillaga um 3 millj. kr. fjárveitingu vegna ýmissa ófyrirséðra útgjalda, svo sem lögfræðikostnaðar við héraðsdómsmál tveggja starfsmanna Landmælinga Íslands gegn íslenska ríkinu, öryggismála og sérfræðikostnaðar við umhverfismat.

Veiðistjóri. Lagt er til að embætti veiðistjóra verði veitt alls 10 millj. kr. aukafjárveiting. Af fjárhæðinni er gert ráð fyrir að 4 millj. kr. fari til þess að leysa uppsafnaðan vanda hundabús frá árunum 1998 og 1999, 3 millj. kr. til endurgreiðslu vegna refaveiða og 3 millj. kr. til endurgreiðslu vegna veiða á mink. Breyting var gerð á gjaldskrá þannig að verðlaun fyrir veidda minka vega meira en akstur og tímakaup. Þetta hafði þau áhrif að fleiri minkar voru veiddir en áður og er endurgreiðsla þegar komin um 2 millj. kr. fram úr fjárveitingum og áætlað að rúmlega 1 millj. kr. bætist við.

Vaxtagjöld ríkissjóðs. Lagt er til að fjárheimild vegna gjaldfærðra vaxta verði aukin um 500 millj. kr. til viðbótar við það sem þegar hefur verið gert ráð fyrir í frv. og að greiðsluheimild verði aukin um 580 millj. kr. Helsta breytingin frá fyrri áætlun er að við endurmat er nú talið að bæði gjaldfærðir og greiddir vextir af erlendum skammtímalánum verði um 330 millj. kr. hærri á árinu. Stafar það af því að annars vegar hefur gengi helstu gjaldmiðla hækkað talsvert gagnvart íslensku krónunni og hins vegar hefur ekki reynst unnt að lækka stöðu á þessum skammtímalánum í eins miklum mæli og áformað var. Þá er af sömu ástæðum reiknað með að vextir af erlendum langtímalánum aukist um 130 millj. kr. Breytingar á vaxtagjöldum af öðrum lánum eru minni og vega hver aðra upp.

Ég hef þá lokið við að gera grein fyrir þeim breytingartillögum sem meiri hluti fjárln. leggur fram. Meiri hlutinn leggur til að frv. verði samþykkt með þeim breytingum sem skýrðar hafa verið hér að framan og gerð er tillaga um í sérstöku þingskjali.

Ég hef gert grein fyrir þeim verkefnum sem út af standa sem eru nokkur verkefni á sviði heilbrigðismála sem við erum enn með í skoðun milli 2. og 3. umr.

Undir þetta nál. rita Jón Kristjánsson, Einar Oddur Kristjánsson, Árni Johnsen, Hjálmar Jónsson, Ísólfur Gylfi Pálmason, Arnbjörg Sveinsdóttir og Kristján Pálsson.