[prenta uppsett í dálka] 40. fundur, 126. lþ.
Steingrímur J. Sigfússon:
Herra forseti. Brtt. sú sem er næst á dagskrá laut að því að taka af allan vafa um að andvirði þeirra fjármuna sem kynnu til að falla við sölu á jörðum eða jarðeignum í eigu Skógræktar ríkisins skyldi varið í þágu Skógræktarinnar og ekki til annarra verkefna. Þetta væri gert til að tryggja að ráðstöfun þessa fjár væri í fullu samræmi við gjafabréf og vilja eigendanna.
Í umræðunum í gær gaf hv. þm. Jón Kristjánsson, formaður fjárln., þær skýringar á þessu máli að það væri skilningur fjárln. að heimildirnar yrðu eingöngu notaðar með þeim hætti. Ekki stæði til að ráðstafa fjármunum, sem kynnu að koma til við sölu á jarðeignum í eigu Skógræktarinnar, öðruvísi en í hennar þágu. Með vísan til þeirra skýringa tel ég að þessu máli sé borgið og kalla tillöguna aftur.
