Menntamálaráðherra (Björn Bjarnason) (andsvar):
Herra forseti. Varðandi útboðin erum við hv. þm. ósammála um þann þátt. Ég tel að hv. þm. eigi einnig eftir að kynnast því í starfi hv. menntmn. þegar þetta frv. verður sent til umsagnar að öflugir aðilar utan ríkisstofnana geta sinnt verkefnum á þessum sviðum og það eigi að nýta krafta þeirra. Ég nálgast þetta mál ekki með því hugarfari að ríkisstofnanir eigi að sitja þar í fyrirrúmi. Þær hafa lögbundnu hlutverki að gegna. En þær eiga að leita samstarfs við aðila utan þeirra veggja til þess að ná sem bestum árangri á þessum sviðum.