[prenta uppsett í dálka] 44. fundur, 126. lþ.
Ögmundur Jónasson (andsvar):
Herra forseti. Hæstv. forsrh. segir hér allt í lukkunnar velstandi, neysluæðinu virðist lokið, segir hann. Ég er ekki alveg viss um að neysluæðinu sé lokið hjá efnafólkinu sem hefur helst tekið þátt í því æði, ég er ekki viss um að það hafi lokið sér af.
Hæstv. forsrh. verður tíðrætt um þumalputtareglur í hagfræði. Hæstv. forsrh. varð frægur að endemum fyrir að beita þumli sínum við áætlanagerð sem borgarstjóri í Reykjavík. Þumallinn borgarstjórans reyndist hvorki honum né borgarbúum góður vegvísir og vísa ég þar í áætlanagerð við Perluna og Ráðhúsið svo dæmi sé tekið.
Ég hef áður heyrt útreikninga og vangaveltur hæstv. forsrh. á viðskiptahallanum og breyttu eðli hans. Ég heyrði þær útskýringar þegar viðskiptahallinn nam á milli 6 og 7% af landsframleiðslu. Nú er hann kominn um 9% og stefnir enn upp á við og enn er allt í lukkunnar velstandi.
En spurningin sem ég vil beina til hæstv. forsrh. er þessi: Á þetta við um alla Íslendinga? Á það við um það fólk sem er húsnæðislaust í Reykjavík, svo dæmi sé tekið, að allt sé í lukkunnar velstandi? Fróðlegt væri að heyra útskýringar hæstv. forsrh. á því og hverjum orðum hann beinir til þess fólks.
