Frsm. samgn. (Árni Johnsen):
Herra forseti. Ég mæli fyrir nál. um frv. til laga um jöfnunargjald vegna alþjónustu árið 2001.
Nefndin hefur fjallað um málið og fengið á sinn fund Ragnhildi Hjaltadóttur frá samgönguráðuneytinu og Gústaf Arnar frá Póst- og fjarskiptastofnun.
Með frumvarpinu er lagt til jöfnunargjald vegna alþjónustu árið 2001. Í 15. gr. fjarskiptalaga, nr. 107/1999, er kveðið á um að jöfnunargjald skuli ákveðið árlega með lögum. Í frumvarpinu er lagt til að jöfnunargjaldið fyrir árið 2001 verði 0,12% af bókfærðri veltu fjarskiptafyrirtækja af almennri þjónustu. Gjaldið hefur í rauninni lækkað úr 0,18% í 0,12% og gerir frumvarpið ráð fyrir að viðmiðunarstuðullinn sem er reyndar 0,10% sé enn til grundvallar í því. Prósentuhlutfallið er fundið út með því að miða við veltu gjaldskyldra aðila á árinu 1999 og fjárþörf sjóðsins árið 2001.
Nefndin leggur til að frumvarpið verði samþykkt óbreytt.